Garin ganyen gwanda da man kaɗanya ba zasu magance maƙoƙo ba

Haɗa garin ganyen namijin gwanda da man kaɗanya zai cire maƙoƙo, a cewar wani saƙo da ke yawo a Facebook a Najeriya.

“ A shafa safe da yamma don kawar da maƙoƙo gaba ɗayan sa,” saƙon ya ce.

Shin hakan zai yi aiki? Mun bincika

Yanayin maganin ya danganta da abun da ya jawo maƙoƙon

Maƙoƙo shine kumburin tairoyid gilan mara raɗaɗi a cikin wuya.

Ƙarancin sinadarin ayodin a cikin abinci ke jawo shi. A wasu lokutan yana ɓacewa da kansa ba tare da magani ba. Ga wasu kuma zai kasance matsala babba da ke ɓukatar maganin asibiti.

Abubuwan da ke jawo maƙoƙo da kuma matsalar da ya ke haifarwa sun haɗa da ƙarancin sinadarin ayodin, matsalar garkuwar jiki, jima’i da shekaru- mata da mutanen da suka haura shekaru 40 su fi zama cikin barazanar kamuwa da cutar- haka nan masu juna biyu, matan da suka daina al’ada da kuma yawan kasancewa cikin matsanancin haske.

Mun tuntuɓi Aihanuwa Eragie, Farfesa a fannin magunguna na jami’ar Benin akan maganin cutar.

“ Akwai abubuwa da dama da ke jawo maƙoƙo, a kimiyance ba yadda za’ayi a ce ka shafa abu ace kuma ciwo ya fice,” a cewar Farfesar.

“ Ana maganin ciwon ta hanyar bada magunguna ko kuma a cire a asibiti.”

Hukumar kiwon lafiya ta Britaniya ta bada shawarar a tsaya a ga gudun ruwan ciwo ga waɗannan maƙoƙon ya kasance ɗan ƙarami ne kuma baya bada matsala. Maganin maƙoƙo dai ya danganta da abun da ya jawo shi.