Babu hujjar cewa yin lilo da jiki na ‘daƙiƙa 10’ zai rage girman furostet ɗin da ya kumbura ‘a nan ta ke’

Wani bidiyo da aka saka a Facebook na iƙirarin cewa dubban maza sun magance matsalar kumburin furostet ta hanya “mafi sauƙi” wato yin “lilo da jiki na daƙika 10”. 

A farkon bidiyon, wanda aka sake saka shi a nan, an nuna wani mutum da ke kwance akan bayansa, ya lanƙwasa gwiwoyinsa, da maɗaurin roba ya ɗaura a cinyoyinsa, yana motsa jikin da aka fi sani da glute bridge. 

Bidiyon ya ce motsa kwankwaso a hankali daga yadda mutum yake ko” lilo” da su, zai yaye matsalolin da suka haɗa da fitsarin dare, tsayawar ragowar fitsari a mara yayin bawali ko ƙarancin fitar fitsari yayin bawali. 

Furostet gilan ya na tsakanin azzakari da mara. Kumburin furostet ana kiransa da banain furostatik haifafilasia. 

Shin wannan nau’i na matso jiki na rage kumburin furostet “a nan ta ke”? Mun bincika. 

Menene kumburin furostet? 

A cewar shafin kiwon lafiya na WebMD, kumburin furostet wata cuta ce da mafi akasari ta ke shafar maza masu shekaru sama da 50. Likitoci da dama sun yarda cewa sauyi daga yanayin ƙwayoyin halitta ke jawo ta, kamar ƙaruwar sindarin dihydrotestosterone a jiki, wanda shine ke da alhakin kula da girman furostet. 

Daga cikin alamun cutar kumburin furostet akwai yawan son yin fitsari, jin zafi yayin fitsari da rashin samun damar fitar da dukkan fitsari daga mara yayin bawali. 

Babu maganin kumburin furostet, cewar Cleveland Clinic, cibiyar kiwon lafiya da ke Amurka. Za dai a iya taimakawa cutar da magungunan da zasu kwantar da tsokar furostet, ko a yi tiyata ko taimakawa da wasu dabaru. Sauyi akan yadda ake gudanar da rayuwa, kamar daina shan barasa da duk wani abun sha kafin a kwanta bacci zai taimaka wajen rage alamun cutar. 

Babu hujjar da ta tabbatar da da’awar

Mun fahimci wasu abubuwa da za’a lura da su a bidiyon da aka saka a Facebook. Da farko dai, mutumin da ke magana a cikin bidiyon bai gabatar da kansa ba, bai kuma faɗi yadda akayi ya cancanta ya bada shawarar ba. Bamu samu tushen bidiyon a kafafen sada zumunta ba, wanda babbar alama ce ta cewa shawarwarin ba abun a amince da su ba ne. 

Mutumin yayi iƙirarin cewa “masu bincike a Harvard” sun binciko cewa kumburin furostet cuta ce da za’a iya “magance ta gaba ɗaya”. Mun samu wani rubutu da akayi 2022 wanda Matthew Solan ya rubuta, babban editan Harvard Men’s Health Watch akan yadda za’a kula da kumburin furostet. Bai ambato motsa jiki na glute bridge ba ko yadda za’a “magance lalurar gaba ɗaya”. 

Mun zanta da Johnson Udoji, rajistara a asibitin National Hospital Abuja akan hanyar maganin da aka ambata a bidiyon, ko hakan zaiyi aiki. 

“Bani da labarin cewa wannan yin ‘lilo’ zai magance wannan lalurar,” a cewarsa. Ya dai bayyana cewa akwai alaƙa tsakanin yawan motsa jiki da raguwar damar samun kumburin furostet, amma wannan bai isa ya magance cutar gaba ɗaya ba. 

Ademola Popoola, babban likitan kula da lafiyar mafitsara kuma babban malami a jami’ar Ilorin, ya shaidawa Africa Check cewa shi dai ba zai tabbatar da ingancin cewa a yi “lilo na daƙika 10 ba”. 

“Babu yadda za’ayi motsa jiki ya warkar da cutar sankarar furostet ko ya rage kumburin da dama ya bayyana.” 

Duk masanan sun yarda cewa zaifi alfanu a nemi taimako a asibiti idan an haɗu da alama ko alamun kumburin furostet.